Milindapañha Opammakathāpañha Kumbhavagga 3. Chattaṅgapañha (MIL7.8.3)

1.1

“Bhante nāgasena, ‘chattassa tīṇi aṅgāni gahetabbānī’ti yaṁ vadesi, katamāni tāni tīṇi aṅgāni gahetabbānī”ti?

1.2

“Yathā, mahārāja, chattaṁ upari muddhani carati;

1.3

evameva kho, mahārāja, yoginā yogāvacarena kilesānaṁ upari muddhani carena bhavitabbaṁ.

1.4

Idaṁ, mahārāja, chattassa paṭhamaṁ aṅgaṁ gahetabbaṁ.

2.1

Puna caparaṁ, mahārāja, chattaṁ muddhanupatthambhaṁ hoti;

2.2

evameva kho, mahārāja, yoginā yogāvacarena yoniso manasikārupatthambhena bhavitabbaṁ.

2.3

Idaṁ, mahārāja, chattassa dutiyaṁ aṅgaṁ gahetabbaṁ.

3.1

Puna caparaṁ, mahārāja, chattaṁ vātātapameghavuṭṭhiyo paṭihanati;

3.2

evameva kho, mahārāja, yoginā yogāvacarena nānāvidhadiṭṭhiputhusamaṇabrāhmaṇānaṁ matavāta-tividhaggisantāpakilesavuṭṭhiyo paṭihantabbā.

3.3

Idaṁ, mahārāja, chattassa tatiyaṁ aṅgaṁ gahetabbaṁ.

3.4

Bhāsitampetaṁ, mahārāja, therena sāriputtena dhammasenāpatinā—

4.1

‘Yathāpi chattaṁ vipulaṁ,

4.2

acchiddaṁ thirasaṁhitaṁ;

4.3

Vātātapaṁ nivāreti,

4.4

mahatī meghavuṭṭhiyo.

5.1

Tatheva buddhaputtopi,

5.2

sīlachattadharo suci;

5.3

Kilesavuṭṭhiṁ vāreti,

5.4

santāpatividhaggayo’”ti.

6.1

Chattaṅgapañho tatiyo.