Milindapañha Opammakathāpañha Makkaṭakavagga 7. Maṇiratanaṅgapañha (MIL7.7.7)

1.1

“Bhante nāgasena, ‘maṇiratanassa tīṇi aṅgāni gahetabbānī’ti yaṁ vadesi, katamāni tāni tīṇi aṅgāni gahetabbānī”ti?

1.2

“Yathā, mahārāja, maṇiratanaṁ ekantaparisuddhaṁ;

1.3

evameva kho, mahārāja, yoginā yogāvacarena ekantaparisuddhājīvena bhavitabbaṁ.

1.4

Idaṁ, mahārāja, maṇiratanassa paṭhamaṁ aṅgaṁ gahetabbaṁ.

2.1

Puna caparaṁ, mahārāja, maṇiratanaṁ na kenaci saddhiṁ missīyati;

2.2

evameva kho, mahārāja, yoginā yogāvacarena pāpehi pāpasahāyehi saddhiṁ na missitabbaṁ.

2.3

Idaṁ, mahārāja, maṇiratanassa dutiyaṁ aṅgaṁ gahetabbaṁ.

3.1

Puna caparaṁ, mahārāja, maṇiratanaṁ jātiratanehi yojīyati;

3.2

evameva kho, mahārāja, yoginā yogāvacarena uttamavarajātimantehi saddhiṁ saṁvasitabbaṁ, paṭipannakaphalaṭṭhasekkhaphalasamaṅgīhi sotāpannasakadāgāmianāgāmiarahantatevijjachaḷabhiññasamaṇamaṇiratanehi saddhiṁ saṁvasitabbaṁ.

3.3

Idaṁ, mahārāja, maṇiratanassa tatiyaṁ aṅgaṁ gahetabbaṁ.

3.4

Bhāsitampetaṁ, mahārāja, bhagavatā devātidevena suttanipāte—

4.1

‘Suddhā suddhehi saṁvāsaṁ,

4.2

Kappayavho patissatā;

4.3

Tato samaggā nipakā,

4.4

Dukkhassantaṁ karissathā’”ti.

5.1

Maṇiratanaṅgapañho sattamo.