Milindapañha Mahāvagga 6. Paṭisandhipañha (MIL3.1.6)

1.1

Rājā āha—

1.2

“bhante nāgasena, atthi koci mato na paṭisandahatī”ti.

1.3

Thero āha—

1.4

“koci paṭisandahati, koci na paṭisandahatī”ti.

1.5

“Ko paṭisandahati, ko na paṭisandahatī”ti?

1.6

“Sakileso, mahārāja, paṭisandahati, nikkileso na paṭisandahatī”ti.

1.7

“Tvaṁ pana, bhante nāgasena, paṭisandahissasī”ti?

1.8

“Sace, mahārāja, saupādāno bhavissāmi paṭisandahissāmi, sace anupādāno bhavissāmi na paṭisandahissāmī”ti.

2.1

“Kallosi, bhante nāgasenā”ti.

3.1

Paṭisandhipañho chaṭṭho.